PSTMO may ‘win-win’ solution sa reklamo sang delivery rider nga ginkumpiskar ang lisensya bangud gindudahan nga peke

ILOILO CITY – Nagdihon sang “win-win” solution si Public Safety and Transportation Management Office (PSTMO) Head Jeck Conlu sa reklamo sang delivery rider nga ginkumpiskar sang taga-PSTMO ang lisensiya bangud gindudahan nga peke.

Suno kay Conlu, gin-istorya niya si Alyas Eric nga amay sang delivery rider nga gindakup kag ang apprehending officer nga si Michelle Benedicto, Community Affairs Assistant II sang PSTMO kahapon hapon, Setyembre 7.

Wala na gin-detalye ni Conlu ang kaundan sang istoryahanay kag ang solusyon nga nadihon.

“Nakasugtanay na kami kag ginplastar naton kag ‘satisfied’ naman ang father sa aton action taken nga ginhatag. Ini’ng hapon lang, nakalab-ut kita sa tawag nga ‘win-win’ solution. Although indi ko na ma-further gid hambal ang kabilugan, ang akon lang abi gid intention nga mahitsu ang gap, issue with regards sa both parties,” suno kay Conlu.

Ginpahayag man niya nga gilayon ibalik ang lisensiya sang rider matapos napamatud-an nga lehitimo sa Land Transportation Office 6 kag ibalik man ang iya ginmulta.

Agosto 24, 2022 sang gindakup ang delivery rider sa Diversion Road sa Mandurriao bangud wala siya naka-helmet kag gin-impound man ang iya motorsiklo sa pagpati sang taga-PSTMO nga peke ang iya driver’s license.

Gin-certify na sang LTO 6 nga lehitimo ang lisensya sang rider pero wala gihapon ginbalik ni Benedicto. –via Firingline