(UPDATE) Pulis nga ginreklamo sa pag-carnap sang motorsiklo sa Pototan kasuhan sang tag-iya nga punong barangay

POTOTAN, Iloilo – Desidido si Lopez Jaena Ward, Pototan Punong Barangay Nicky Pescuela nga kasuhan si PCpl Darryl Dumaraog, assigned sa Regional Mobile Force Battalion nga na-base sa Calinog, Iloilo, nga suspek sa pag-carnap sang iya motorsiklo.

Nadakpan sa follow-up operation sang Pototan police si Dumaraog, pero wala pa makita ang motorsiklo.

Ginsaysay ni PB Pescuela nga gin-park niya ang iya motorsiklo sa Pototan plaza antes siya nag-jogging mga las-kuwatro kahapon sang kaagahon, Setyembre 7.

Dala man ni Pescuela ang liyabe pero “ang iya yabihan [sang motorsiklo] uhang na. Bisan ano nga liyabe pwede magamit.”

Mga las-singko sang aga, nakita niya ang lalaki nga nagsakay sa iya motorsiklo.

Ginlagas pa ni Pescuela upod sa mga street sweepers ang suspek pero wala nila naabtan.

Na-identify si Corporal Dumaraog sang gin-check ang CCTV footage sa palibot sang plaza. Nakilala si Dumaraog bangud naka-agi siya board sa balay sang barangay secretary ni PB Pescuela.

Na-alarm na suno sa kapitan ang iban nga mga banwa nga posible gindal-an sang iya motorsiklo.

Nagapanawagan man ang kapitan sa nakakita sang iya motorsiklo nga gilayon makig-angut sa iya ukon sa Pototan police. “Black nga XRM 125 [ang motor ko]. Gisi na ang bangko.”

Todo panginwala suno sa kapitan ang pulis nga siya ang nagkuha sang motorsiklo.

“Naka-istoryahanay kami. Indi gid siya ‘ya mag-ako. Ato siya kuno sa [Calinog] sa iya na-dutyhan,” ang pahayag ni PB Pescuela. –via Aksyon Hotline