Wanted person natiruhan sang ginahayag nagbato sang serbihan sang arrest warrant sa Cabatuan, Iloilo

ILOILO – Gindala sa ospital si Jo-an Lego, lalaki, 41-anyos, sang natiruhan matapos ginpahayag nga nagbato sa mga pulis sang ginserbihan sang warrant of arrest mga las-otso kaina sang aga sa Brgy. Acao, Cabatuan.

Estable na si Lego nga may pilas sa kamot kag lawas, suno kay PCPT Myles Dieron, hepe sang sang Cabatuan MPS.

Magluwas kay Lego, gin-aresto man si Maylin Araneta nga live-in partnert niya.

Nag-upod sa joint operation ang mga pulis halin sa Cabatuan, Lambunao, Guimbal kag Pototan.

Si Lego ang may warrant of arrest sa kaso nga carnapping, pagpangawat kag contempt of court. Gina-verify pa sang Cabatuan police kun may warrant of arrest man si Lego sa iban nga police stations.

Si Araneta naman ang may kaso nga contempt of court kag pagpangawat.

“Sa pagkabalo ko damo ni siya [si Lego] ginpangsaka-saka nga mga balay,” suno kay PCPT Dieron.

Ginkumpirmar ni PCPT Dieron nga kabahin si Lego sang Lego-Libuna Criminal Gang nga naga-operate sa probinsya sang Iloilo. – via Balita, Banat, Bulig