JP Bosque kag Mark Libao, may mga lagub kag gasgas pa sa lawas magluwas sa gunshot wounds base sa autopsy result
ILOILO — May iban pa nga mga injuries magluwas sa multiple gunshot wounds sanday JP Bosque kag Mark Libao nga ginpamatay sa Villa Pani-an, Estancia, Iloilo sang Setyembre 14.
Suno ini kay Dr. Owen Lebaquin, anay medico legal officer sang Police Regional Office 6 nga amo man ang nag-conduct sang autopsy sa ila mga bangkay.
May gasgas sa tunga nga parte sang dughan, wala nga porsyon sang sag-ang, kag lagub sa wala nga guya si Bosque suno kay Lebaquin.
Samtang may black eye naman sa wala, lagub kag gasgas sa agtang si Libao.
Ginpahayag man ni Lebaquin nga kun basehan ang mga pilas sang mga biktima nga may mga metallic fragments, malapit lang ang distansiya sang nagtiro sa ila kag ginabanta nga duha ukon tatlo ka tapak lang ang kalayuon.
May mga metallic fragments suno sa iya sa guya si Bosque samtang sa tuo nga kamot kag guya naman si Libao.
May patimaan man suno kay Lebaquin nga mas mataas ang posisyon sang nagtiro sa mga biktima kun basehan ang trajectory sang bala nga nag-igo sa ila.
Ang autopsy result pa lang nanday Libao kag Bosque ang napagguwa ni Lebaquin bangud nga ginatapos pa niya ang resulta sang autopsy ni Floyd Fernandes nga isa man sa mga napatay sa insidente.
