Electricity rate sang MORE Power, masaka

ILOILO CITY — Masaka sang P3.34 per kWh ang residential electricity rate sang MORE power sugod subong nga bulan.

Base sa gin-anunsyo sang power utility company, halin sa P9.14 per kWh, magalab-ut na sa P12.48 ang per kWh subong nga Setyembre.

Suno sa MORE power, indi na maka-supply ang PSALM Corporation sang long-term power requirements sa MORE power bangud natapos na ang kontrata sini sa Unified Leyte Geothermal Power Plant nga source sang power sang PSALM.

Kasunod sini, nagpa-idalum ang MORE power sa Competitive Selection Process (CSP) ukon competitive bidding sa mga kompaniya nga mandu sang Department of Energy agud maka-secure sang manubo nga presyo sang power supply.

Sa tiun sang CSP, coal-fired power plants ang nagahatag sang lowest rate sa MORE power nga P2.91 per kWh nga mas manubo sang sa P3.6 per kWh sang PSALM.

Bangud sini, nagtaas ang rate sa kuryente bangud man sang pagtaas sa generation charges sang power suppliers sang MORE Power. Ang amo nga charges halin sa Power Supply Agreements (PSAs) ang epekto sang mataas nga coal prices sa global market.

Nagpasalig ang MORE power nga ginahimo nila ang tanan agud magnubo ang electricity rate.