SITG PALIBOSFER, magahimo sang luminol test sa Villa Pani-an, Estancia agud mahibaluan kun may iban pa nga crime scene sa shooting incident

ILOILO — May mga “priority areas” ang Special Investigation Task Group (SITG) PALIBOSFER nga pagatutukan sa himuon nga luminol test sa Lunes agud mahibaluan kun may iban pa nga crime scene sa shooting incident sa Estancia.

Suno kay SITG PALIBOSFER spokesperson Police Senior Master Sergeant Francisco Lindero, Jr, indi niya mabuyagyag kun pila kag kun diin nga area himuon ang luminol test pero suno sa iya, lakip diri ang salakyan sang tatlo ka mga biktima nga sanday JP Bosque, Floyd Fernandes kag Mark Libao.

Ginpahayag ni Lindero nga sa padayon nila nga pag-imbestigar, nakatipon na ang SITG sang under oath affidavit sang pila ka mga indibidwal, resulta sang scientific kag forensic investigation kag iban pa nga mga ebidensya nga makabulig sa kaso.

May tatlo ka affidavit sang pamilya kag testimonya sang iban pa ka indibidwal ang gina-uyatan sang SITG samtang duha naman sa NBI.

Tanan nga ebidensya nga natipon sang SITG lakip na ang mga impormasyon nga ila nabaton ang gina-validate sang mga imbestigador kag Intel personnel agud madasig nga masolbar ang kaso suno kay Lindero.

Padayon naman nga gina-vaildate kun may kwarta gid man sa salakyan sang mga biktima antes natabo ang krimen.