2 patay 1 pilason sang nakabunggo ang motorsiklo sa poste sa Pavia

Duha ang napatay samtang isa ang pilason sang nakabunggo ang motorsiklo sa poste sang streetlight sa Ungka 1, Pavia las-2:45 kahapon sang kaagahon, Setyembre 26.

Ginkilala ang napatay kanday Marian Grace Jegonia, 21, nga driver sang motorsiklo kag residente sang Brgy. Bitoon, Jaro kag iya backrider nga si Nethalyn Mae Gardose, 20, sang Brgy. Guiso, Calinog.

Magluwas diri, pilason naman ang isa pa ka backrider nga si kay Maria Charmaine Oredina, 18, sang Brgy. Buntatala, Jaro.

Suno kay Police Major Rolando Araño, hepe sang Pavia PNP, lunsay wala nakasuksok sang helmet ang tatlo nga padulong kun tani sa Calinog.

Ginpahayag sang pulis nga lunsay naka-inum sang makahulubog nga ilimnon ang tatlo kag madasig ang pagpadalagan sang motorsiklo.

Padayon nga ginabulong sa Western Visayas Medical Center ang pilason nga si Oredina.