367 ka pamilya apektado sang pagbaha dala sang high tide sa Iloilo City
367 ka mga pamilya ukon 1, 076 ka mga indibidwal ang apektado sang pagbaha dala sang high tide ukon pagtaub sa Iloilo City kaina sang kaagahon.
Suno kay City Disaster Risk Reduction and Management Office (CDRRMO ) Head Darwin Papa, 21 ka mga barangay sa siyudad ang ginsul-ob sang tubig-dagat bangud sang high tide nga nagalab-ut sa 1.9 meters.
Bangud sini, madamo nga mga residente sa nasambit nga mga barangay ang gin-evacuate.
Samtang, gin-athag ni Papa nga wala sang direkta nga epekto ang Bagyo Paeng sa mga pagbaha sa siyudad kundi dala lang sang high tide.
Gina-consolidate naman sang CDRRMO ang numero sang mga balay nga naguba bangud naigo sang mabaskog nga hangin kag dalagku nga balod.
