Fuel shortage nagapamintana sa Antique bangud sa pagka-utod sang Paliwan bridge sa Laua-an kag Oyungan bridge sa Miagao
Nagapamintana ang fuel shortage sa Antique kasunod sang pagka-utod sang Paliwan bridge sa Laua-an nga mayor nga dalan halin sa Northern Antique.
Ini ang ginpahibalo ni Antique Governor Rhodora Cadiao sa tiun sang briefing upod sa pila ka Cabinet secretaries nga nagpadulong sa probinsya sa pagpanguna ni Interior Secretary Benhur Abalos kahapon, Nobyembre 2.
Gintumod man ni Cadiao ang pagkaguba sang Oyungan bridge sa Miagao bangud sa bagyo Paeng.
Sa subong ginpahayag sang gobernador, nga wala pa ginakulang sang gatong ang probinsya apang nagatuga na sang panic ang ginapanan-aw nga fuel shortage.
Nagahimo na sang gasoline rationing ang probinsya apang indi ini bastante suno kay Cadiao.
Nagalaum si Cadiao nga masolusyunan ang problema kun paano makalab-ut sa probinsya ang tanker sang gasolina.
Lakip man sa mga problema sang Antique provincial government ang ginakulang nga oxygen tanks sa mga ospital, infrastructure projects sa pila ka mga sitios, subong man food packs kag tubig para sa mga island municipalities sang Culasi kag Caluya.
