‘Lain ang ASF sa Swine Flu’ –Provincial Veterinarian Dr. Darel Tabuada

ILOILO – Ginpa-athag ni Dr. Darel Tabuada, head sang Iloilo Provincial Veterinary Office (PVO), ang kinalain sang African Swine Fever kag Swine Flu.

Suno kay Dr. Tabuada, pareho nga nagalaton sa baboy ang ASF kag Swine Flu.

Pero “ang African Swine Fever is specific lang sa baboy. Wala na siya nagalaton sa other species. Ang Swine Flu is upod na sila sang H1N1 virus ukon Avian Influenza virus nga pwede siya maglaton sa poultry kag pwede siya maglaton sa tawo.”

Kun infected ang baboy sang Swine Flu suno kay Tabuada, pareho lang ini sang ordinaryo nga trangkaso, “may fever, wala gana magkaon, may ara kun kis-a nga galuya.”

Kun infected naman ang baboy sang ASF, makabatyag man ini sang trangkaso kag wala gana nga magkaon pero may hemorrhage na nga makita. “May makita ka sina nga pantal-pantal sa panit, gadugo ang ilong, gapamus-on sang dugo ang severe infection.”

Kun maihaw na ang baboy, mahibaluan nga ASF ang nag-igo diri bangud may pintol-pintok ang karne, dugang ni Tabuada. “Daw sulalob, daw lagub. Ang Swine Flu ya, wala ka sang makita sina sa karne.”

Ang naga-igo subong sa probinsya suno kay Tabuada amo ang African Swine Fever kag indi Swine Flu.

Sa data sang PVO as of November 10, 2022, may 182 ka baboy halin sa lima ka banwa sa probinsya nga positibo sa ASF base sa resulta sang 407 ka blood samples nga gin-test. Ang lima ka banwa nga may na-record nga ASF amo ang Oton, San Miguel, Alimodian, Leganes kag Santa Barbara. –via Aksyon Hotline