Benzen Llamado nga isa sa mga ginkasuhan sa Estancia killings nanindugan nga wala siya sang kahilabtanan sa krimen
Ginkakibot ni Benzen Llamado nga nalakip siya sa mga ginpasakaan sang kaso nga murder sa pagpatay sa tatlo ka mag-abyan nga JP Bosque, Mark Libao, kag Floyd Fernandes nga nasapwan sa Barangay Villa Panian, Estancia, Iloilo sang Setyembre 14, 2022.
Ginapanindugan ni Llamado nga wala siya sang kahilabtanan sa kamatayon sang tatlo.
Ginpahayag ni Llamado nga may kabataan man siya gani nabal-an niya kun ano kasakit nga mapatyan.
Gin-athag niya nga wala siya sang may ginabasol sa pagdalahig sang iya ngalan kag ginalakip niya man sa pagpangamuyo nga mahatagan sang hustisya ang kamatayon sang tatlo.
Ginklaro ni Llamado nga wala siya sang kilala sa iban nga ginpasakaan sang kaso.
Ginahulat pa ni Llamado ang kopya sang gin-file nga kaso batuk sa iya. Nagpasalig siya nga magasabat sa dugang nga mga pamangkot kun mabasa na ang kopya sang reklamo.
