Jevron Parohinog gin-claim nga involved sa shabu lab sa Manila sanday JP Bosque, Floyd Fernandes base sa supplemental affidavit sang utod ni Floyd
Gin-claim ni Jevron Parohinog nga involved sa shabu laboratory sa Manila sanday JP Bosque kag Floyd Fernandes.
Ini ang ginsugid ni Jevron sa iloy kag utod ni Floyd base sa supplemental affidavit ni Charlotte, sang ginpamangkot kun ngaa wala siya sang pilas matapos nasapwan sanday JP, Floyd kag Mark Libao sa Villa Panian, Estancia sang Setyembre 14 sang kaagahon.
Ginsugid ni Charlotte sa iya affidavit nga ginpabutyag ni Jevron nga indi niya mahimo nga i-set up ang natabo sa ila.
“Wala lang kamo ka balo nga may mga illegal pa sila nga transaction!” ang pahayag ni Jevron sa iloy kag utod ni Floyd.
“Bal-an niyo nga involved sila sa shabu laboratory sa Manila. So ma-invest sila para sa shabu laboratory in Manila,” dugang pa ni Jevron.
Gin-claim man ni Jevron suno kay Charlotte nga may plano mag-invest sa online sabong sanday JP kag Floyd paagi kay “Moi.”
Si Moi suno kay Jevron nga may online sabong amo ang gina-transaksyon nanday JP kag Floyd paagi kay certain Mike. Si Mike ang nagahatag sang authority kay Moi nga ma-operate sang online sabong sa bilog nga Norte upod kay Floyd kag JP base sa affidavit ni Charlotte.
Dugang pa ni Charlotte nga ginsugid ni Jevron nga nagkadto sa Estancia si JP agud magkuha sang P7.5 million niya nga bayad sa utang.
Ang P4 million sa amo nga kantidad amo ang proceeds sang fishing vessel nga ginbakal ni Jevron kay JP samtang ang P3 million amo ang utang sang Setyembre 13.
Ang nabilin naman nga P500,000 amo ang interest sang utang. Gin-isip ni JP ang kwarta gamit ang money counter.
Base sa affidavit ni Charlotte, ginsugid ni Jevron nga nagkadto sila sa Estancia agud magpakigkita si JP kay Moi agud maghatag sang iya “investment.”
Una ginhisugtan nga makit-anay sa Malbog District Hospital kag diri ihatag ang “investment” apang nagbaylo sang lokasyon kag nahisugtan nga makit-anay sa bulangan malapit sa Villa Panian kag ang mga tinawo ni “Moi” ang makuha sang bayad.
Si Jevron ang nagbulos drive kya JP sang salakyan pakadto sa Villa Panian bangud siya ang nakahibalo sang lugar. Nagsaylo naman sa back passenger seat si JP upod si Mark.
Samtang nagabiyahe, may gina-istorya si JP sa cellphone kag sang nag-abot sa cockpit, nakita nila ang duha ka unidentified nga lalaki gani ginhambalan ni JP ang iya ka-istorya sa telepono nga “sila na na guro.”
Nagpalapit ang salakyan sang mag-abyan sa duha ka mga lalaki. Nagpalapit naman ang duha ka mga lalaki sa side sang salakyan ni JP. Sang ginbuksan ni JP ang pwertahan sang salakyan, naghambal ang isa sa duha ka lalaki nga “nagab-ihan na kamo ba!”
Sang gindaho ni JP ang kwarta sa lalaki, gilayon siya gintiro base sa pahayag ni Jevron sa iloy kag utod ni Floyd.
Sang nabatian ang lupok, nag-drive palagyo si Jevron apang nadulaan siya sang control sa salakyan.
Ginpahayag ni Jevron nga nakita niya nga gintiro si Floyd kag natumba sa talamnan, ginpalapitan sang gunman kag tiruhon pa gid apang nag-jam ang pusil. Sa baylo, ginkuga na lang sang gunman si Floyd suno pa kay Jevron.
