Jevron Parohinog gin-identify ang gunman sa Estancia killings base sa iya supplemental affidavit
Gin-identify ni Jevron Parohinog, ang gunman nga nagpatay sa iya mga abyan nga sanday JP Bosque, Mark Libao kag Floyd Fernandes nga nasapwan sa Villa Panian, Estancia sang Setyembre 14 sang kaagahon.
Sa supplemental affidavit ni Jevron, ang lone survivor sa krimen, gintudlo niya si Michael Quiatchon nga amo ang nagtiro sa iya mga abyan.
Na-identify ni Jevron si Quiatchon sang nakita niya sa sulod sang presuhan sang nagkadto siya sa Estancia Police Station sang Oktubre 12, las 11 sang aga agud mag-file sang kaso batok kay Michael Porras, isa man sa mga suspects sa krimen.
Nadumduman niya ang hitsura ni Quiatchon nga amo ang nagkumusta kag nag-istorya kay JP Bosque, las 12:30 sang kaagahon sang Setyembre 14.
“Nagpalangurog ako kag nakabatyag sang grabe nga kakulba sang nakita ko ang tawo sa sulod sang presuhan kag nadumduman ko gid ang iya itsura sang nakita kko nga siya ang nagkumusta kag nag-istoryahanay sila ni JP [Bosque] sang takna 12:30 sang kaagahon petsa, Septembre, 2022,” ang pahayag ni Jevron sa iya supplemental affidavit.
Magkaupod suno sa iya sanday Porras kag Quiatchon sang gab-i nga nagkadto sila sa Villa Panian.
Gintudlo ni Jevron si Quiatcon nga kaupod ni Porras nga nagpara sang ila salakyan kag nagtiro sa ila.
“Ang gintudlo ko sa ila nga lalaki nga ara sa sulod sang presuhan kag sigurado gid ko nga siya ang nagtiro sa amon, kun sa diin napatay nanday JP, Floyd kag Mark didto sa Barangay Villa Panian, Estancia, Iloilo sang takna las 12:30 sang kaagahon petsa 14 Septembre, 2022,” ang dugang nga pahayag ni Jevron.
Nakilala ni Jevron si Quiatcon bangud masanag ang suga sa sulod sang salakyan kag natandaan niya gid ang hitsura.
Ginpabutyag ni Jevron nga nag-file siya sang supplemental affidavit agud maghatag sang dugang nga panaysayon may kaangtanan sa iya nahibaluan sa krimen kag pagkadula sang iya kwarta.
Dugang pa ni Jevron nga para sa capital ni JP Bosque ang P1.5 million nga suno sa iya ginkuha.
Gin-ako niya nga may dala nga kwarta si JP kag nasulod ini sa itum nga bag.
Sang ginpamangkot si Jevron kun diin ang P7.5 million, ginpahayag niya nga: “Wala na,, dungan sang pagpalagyo sadtong nagtiro sa amon.”
