Ginabanta P5 million nga balor sang alahas, cellphones, ginkawat sa baligyaan sa Gaisano mall sa Balasan, Iloilo

ILOILO — Five million pesos nga balor sang mga alahas, cash kag P359,000 nga balor sang mga cellphone units ang nataban sa mga kawatan sa baligyaan sang mga alahas kag cellphones nga nahamtang sa Gaisano mall sa Balasan kahapon, Disyembre 5.

Suno kay PSSg Eddie Mar Magbanua, imbestigador sa Balasan Police Station, las 8 kahapon sang aga nakabaton sila sang tawag halin sa Human Resource (HR) officer sang mall nga may robbery sa sulod sang establisemento.

Sang nagresponder ang Balasan police, nakita nga nakuha sang mga suspects ang vault sang F&C Jewelry sa diin natago ang P36,000 pesos nga cash kag 964 ka mga alahas nga ginabanta nagabalor sang P5 million.

Magluwas sa baligyaan sang mga alahas, ginkawatan man ang baligyaan sang cellphone.

Base sa initial nga inventory, nataban sang mga kawatan ang 24 ka Vivo units nga ginabanta nagabalor sang P292,000, kag siyam (9) ka Samsung units nga ginabanta nagabalor sang P67,000.

Ginapatihan sang Balasan police nga nag-agi sa fire exit ang mga suspects.

Nagapadayon ang imbestigasyon sang Balasan police sa insidente.