Carousel traffic scheme ipatuman sa Ungka flyover agud maghagan-hagan ang pagpugok sang trapiko

ILOILO CITY – May adjustments nga himuon agud malikawan ang pagpugok sang trapiko sa Ungka Flyover area sa Huwebes, Disyembre 8.

Suno kay Public Safety and Transportation Management Office (PSTMO) Head Jeck Conlu may ipatuman sila nga carousel traffic scheme kaupod ang Pavia Traffic Management Office, kag Department of Public Works and Highways (DPWH) 6.

Kun halin sa Pavia, Iloilo padulong sa Iloilo City kag vice versa, indi na kinahanglan mag-U turn sang mga salakyan sa intersection kundi diretsuhon na ang pagsubay sang dalan.

Ang mga salakyan naman nga halin sa Mandurriao nga nagasubay sa C1 road nga mapadulong sa direksyon sang Tacas, Jaro, kinahanglan nila magliko pa-tuo pag-abot sa intersection padulong sa Ungka terminal kag mag-U-turn pabalik sa direksyon sa Pavia kag maliko naman padulong sa Tacas.

Samtang ang mga salakyan halin sa Tacas, Jaro nga mapadulong sa Mandurriao nga nagasubay sa C1 road, kinahanglan nga magliko padulong sa direksyon sang Pavia pag-abot sa intersection kag mag-U-turn pabalik sa siyudad antes magliko pa-Mandurriao.

TRUCK BAN

May ipatuman nga truck ban sa intersection sa nasambit nga area sa tiun sang rush hours, suno kay Conlu.

Ipatuman ini halin las-seis sa aga tubtob las-otso sa aga, kag las-kuwatro sa hapon tubtob las-siete sa gab-i.

Nagalaum si Conlu nga makabulig ini agud maghagan-hagan ang pagpugok sang trapiko sa nasambit nga lugar.