Iloilo City Mayor Jerry Treñas nagpaandam nga patempranuhon ang liquor ban kun may matabo liwat nga kinagamo sa restobars
ILOILO CITY – Nagpaandam si Iloilo City Mayor Jerry Treñas nga patempranuhan pa sa las-10 sa gab-i halin las-12 sa tungan gab-i ang liquor ban kun masundan ang mga kinagamo sa mga restobars sa siyudad.
Kaina nagsapol ang Iloilo City Police, compliance team, kag mga owners sang mga restobars kasunod sang nagluntad nga rambol sa The Versteck sang Disyembre 3.
Naghingyu suno sa alkalde ang mga establisemento sang police assistance kun may mga customers nga magpamilit magsulod sa lugar.
Nadiskusyunan man ang mga ipatuman nga measures agud mapabakod pa ang seguridad bangud responsibilidad sang mga tag-iya kun ano man ang matabo sa sulod sang ila establisemento. Nakasugtan man nga dapat arestuhon ang mga madakpan nga nagatuga sang komosyon kag pasakaan sang reklamo.
Kasunod sini, nagpaguwa sang Executive Order No. 49-A, series of 2022 si Mayor Treñas nga tubtob na lang las-12 sa tungan gab-i ang pagbaligya kag pag-inom sang makahulubog nga ilimnon sa mga public places sa siyudad agud malikawan ang mga kinagamo.
“We are forced to move the operating hours of all these establishments from 2:00 AM to 12:00 AM to avoid incidents like this from happening again. If the same event happens, we will be moving the time from 12:00 AM to 10:00 PM,” suno pa kay Treñas.
Pasiraduhan naman ang mga establisemento kun pahanugutan ang overcrowding ukon pagginutok.
