Anilao LGU mahiwat sang ‘Lechon Christmas Countdown’
ILOILO — Gina-agda ni Anilao Mayor Nathalie Ann Debuque ang mga Anilaonon nga magpartisipar sa “Lechon Christmas Countdown” nga hiwaton kada Sabado kag Domingo tubtob sa adlaw sang paskwa.
Base sa Facebook post sang alkalde, gin-schedule ang kahiwatan sa Disyembre 10, 11, 17 kag 18, sa Municipal Gym halin las 11 sa aga tubtob las 2 sa hapon.
EXCLUSIVE lang sa mga Anilaonon ang event.
May ipanagtag nga voucher ang Mayor’s office sa kada residente agud makasulod sa venue.
Indi paghatagan sang voucher ang wala sang vaccination card.
ANO ANG EVENT RULES?
Wala sang takeout (i-check ang mga bags ukon containers antes magsulod sa venue)
Magdala sang kaugalingon nga plato kag kubyertos
Magdala sang kan-on
Wala sang leftovers
Kun may bilin nga pagkaon, pasauton sa stage bilang penalidad
May ibutang nga handwashing kag BP measuring areas para sa health safety
Ginpaathag ni Debuque nga hiwaton ang event agud maghatag sang kasadya sa banwa.
Ang mga lutuon nga baboy sa event ang pagabaklon sa mga backyard hog raisers sa Anilao bilang preemptive depopulation measure batok sa African Swine Fever.
Sa subong, wala sang na-record nga ASF case sa Anilao.
Una na ginhaylo ni Iloilo Governor Arthur Defensor, Jr. ang tanan nga banwa sa probinsya nga maghiwat sang Pork Festival bilang preventive measure batok sa ASF.
