Una nga adlaw sang SIM registration gin-ulan sang mga reklamo

Gin-ulan sang reklamo ang una nga adlaw sang pagsugod SIM card registration kahapon, Disyembre 27.

Ini bangud indi makasulod ang mga subscribers sa link nga ginhatag sang mga telecommunication companies para sa registration.

 Sa paglibot sang Aksyon Radyo Iloilo news team kag base man sa feedback nga ginapa-agi sa hotline number sang estasyunan, nagareklamo ang mobile users nga nabudlayan sila sa pag-access sa mga SIM registration platforms sang mga telco providers ilabe na sa Globe telecom kag Smart Communications. 

Suno sa mga Globe subscribers, lain nga link ang nagaguwa kun mag-access sila sa website. 

May mga Smart users naman nga nakasulod sa SIM registration website, pero indi maproseso ang ila registration.

 Sa advisory sang Smart kahapon, ginpahibalo sini nga madamo nga mga subscribers ang nagaparehistro sang ila SIMs rason nga mabudlay nga maka-access.

Ginatinguhaan naman sang ila technical team nga ma-increase ang capacity sang online platform agud ma-akomodar ang mga maparehistro.           

Ginpaathag naman sang Globe telecom nga na-bog down ang ila registration site bangud sa kadamuon sang mga registrants. — with reports from Aksyon Angel Mae Ciudad