DPWH nag-conduct sang load testing sa Ungka Flyover
ILOILO CITY – Nag-conduct sang load testing kagab-i, Enero 12, ang Department of Public Works and Highways (DPWH) 6 sang nakabaton sang “go signal” halin sa Bureau of Design (BOD) DPWH Central Office.
Suno sa taga-DPWH 6, himuon ang load testing sa ikatatlo; ika-apat kag ikalima nga haligi sang flyover.
Nagabug-at sang 28 ka tonelada nga may karga nga balas nga truck kag anum ka mga salakyan nga may bug-at nga tatlo ka tonelada ang gingamit sa load testing.
Sa sulod sang 15 minutos gina-obserbaran kag gina-monitor sang mga engineers sa idalum sang flyover gamit ang engineering instruments kun may paghulag sa haligi nga gina-test.
Ginpasalig sang DPWH 6 nga ipaguwa ang resulta sa ginhimo nga load testing.
Gin-conduct ang load test agud nga masuportahan ang rekomendasyon ni DPWH 6 Director nga temporaryo nga buksan ang two lanes sang flyover para sa Dinagyang Festival 2023.
