Listahan sang i-relieve nga mga personnel sang Mandurriao Police Station kag CDEU napasa na kay PRO 6 Dir. Leo Francisco – ICPO Dir. Joeresty Coronica

Approval na lang ni Police Regional Office 6 Director BGen. Leo Francisco ang ginahulat sa pag-relieve sang mga personnel sang Mandurriao Police Station kag City Drug Enforcement Unit (CDEU).

Suno kay Iloilo City Police Office Director Col. Joeresty Coronica, napasa na niya kaina sang aga kay BGen. Francisco ang listahan sang mga inug-relieve nga police personnel.

Wala niya ginhingadlan kun sin-o ang yara sa iya listahan apang ginpabutyag niya nga indi tanan nga mga police sa Mandurriao ang ipang-relieve. May mapabilin suno sa iya nga personnel ilabi na ang mga wala man sang kahilabtanan sa illegal drug operation ang ila duty.

Ipamutang suno sa iya sa iban nga police station ang i-relieve nga mga personel kag pang-islan sang mga halin naman sa iban nga police stations sa siyudad.

Samtang tanan naman nga personnel sang CDEU ang pang-islan suno kay Col. Coronica.

Ang anti-drug operation sa Brgy. Bakhaw, Mandurriao sang damlag lang sa diin 32 ang mga nagkaladakpan ang isa sa mga rason suno kay Coronica kun ngaa gimandu ni BGen. Francisco ang pagpa-relieve sa mga police personnel.