Pagpahamtang sang dry standpipe ginarekomendar sang BFP sa mga fire-prone barangays sa Iloilo City

ILOILO CITY – May mga rekomendasyon ang Bureau of Fire Protection- Iloilo City sang mga dapat himuon sang mga fire prone barangays ilabe na ang mga may makitid nga dalan kag indi madali-dali sulod sang mga fire trucks.

Ini ang ginpabutyag ni Iloilo City Fire Marshal Chief Inspector Vencie Jojo Aldeguer

kasunod sang sunog sa West Habog-Habog kag San Juan, Molo nga nagtupok sang malapit 300 ka balay.

“Ma-recommend kita siguro para sa installation sang mga dry standpipe, ini’ng mga tubo nga may connection sa guwa kag sa sulod puwede maangtan sang hose kag mga nozzle naton. Isa na siya ka ginalantaw naton nga mga one of the best recommendations sa mga indi gid masulod nga barangay,” suno kay Aldeguer.

Puwede man suno sa iya nga magpahamtang sang fire pump agud magamit gid kun may sunog bisan indi na magsulod ang mga bombero.

Sa nagluntad nga sunog sa nasambit nga barangay, naatrasar nga makasulod ang mga bombero ilabe na sa West Habog-Habog bangud makitid ang dalan kag malapnagon nga illegal parking.

Ginpaathag ni Aldeguer nga sila man ang nagatumod kun diin puwede butangan sang dry standpipe.