Mga tricycle, taxi drivers nga nagadul-ong sang pasahero sa Bakhaw, Mandurriao wala sang dapat kulbaan — PB Joel Alvarado
ILOILO CITY — Nagpasalig si Bakhaw, Mandurriao Punong Barangay Joel Alvarado sa mga tricycle kag taxi drivers nga wala sang dapat kakulbaan sa pagdul-ong sang mga pasahero sa ila barangay.
Suno kay Alvarado, wala sang dapat nga kabalak-an ang mga drivers ilabe na kun wala sila sang may malain nga ginahimo, ilabe na kun matyempuhan nga may gina-conduct nga drug buy bust operation sa lugar.
Sang damlag lang, 32 ang nadakpan sa operasyon sang Regional Police Drug Enforcement Unit (RPDEU) kag kalabanan sa ila ang ginkasuhan sang visiting drug den. Lakip sa gindakup ang tricycle driver nga taga-Boulevard, Molo nga nanindugan nga nagdul-ong lang siya sang pasahero.
Ginpabutyag ni Alvarado nga maka-testify sila nga mga barangay officials kun naga-engage gid sa illegal drugs ang nagaka-ulamid sa operasyon nga nagapanindugan nga wala sang kahilabtanan sa illegal activities.
Nagpanugyan siya sa mga taxi drivers nga kun may idul-ong nga pasahero sa ila lugar, indi na magpanaug agud indi mangin kwestyunable sa mga operatiba.
Nag-abiso man si Alvarado sa mga tricycle drivers nga gilayon maglakat pagkatapos dul-ong sang pasahero.
May record man ang barangay sang ila mga residente lakip na ang ginabanta sa 1,000 ka mga boarders.
