Hibao-an Flyover ginalauman nga matapos antes magtakop ang tuig suno sa DPWH 6

ILOILO CITY – Ginapana-aw sang Department of Public Works and Highways (DPWH) 6 nga matapos antes magtakop ang tuig ang Hibao-an Flyover sa Mandurriao.

Suno kay DPWH 6 Assistant Regional Director, Engr. Jose Al Fruto, nagahulat na lang sila sang award para sa “completion phase” sang flyover. Nagapadayon ang pag-obra sa proyekto agud nga magamit gilayon.

Dugang ni Fruto, yara sa ahensya ang P100 million nga pondo halin sa General Appropriations Acts (GAA) nga gamiton sa pagpatapos sang flyover.

Ginpabutyag man ni Fruto nga wala pa nila ma-istoryahan ang pagpalapad sang dalan sa kilid sang Hibao-an flyover apang ginapreparahan na nila ang masunod nga plano.

Ang Hibao-an Flyover may P591.2 million nga pondo. May anum ka 40 metro ini nga span kag 240 metro ang kalabaun.

Makabulig ang Hibao-an Flyover sa pagpahagan-hagan sang trapiko sa Pavia, San Miguel, kag Metro Iloilo, ilabe na sa Mandurriao District. – via Cedrick Anona