Ash Wednesday gina-obserbar subong nga Pebrero 22
Mabalik na ang simbahan katoliko sa pagpalhit sang abo sa agtang sang mga deboto subong nga tuig.
Tungod sini, wala na sang may ginapaguwa nga pagsulundan ang Catholic Bishops’ Conference of the Philippines ukon CBCP sa pag-obserbar sang Kwaresma tungod yara na sa new normal ang pungsod
Suno kay Father Angelo Colada, Director sang Commission on Social Communications sa Archdiocese sang Jaro, wala na sang restrictions sa iban nga mga aktibidad sang simbahan sa tiun sang Kwaresma.
Madumduman sang sang 2020 kag 2021 nag-issue ang CBCP sang guidelines sa mga simbahan bilang paghalong batok sa COVID-19 pandemic.
Ang Ash Wednesday patimaan sang pagsugod sang Kwaresma, ang 40-ka adlaw nga pagpamalandong para sa mga Katoliko.
Ang ulihi nga semana sang kwaresma nga amo ang Semana Santa ginakabig nga isa sa pinaka-importante nga semana para sa mga Katoliko sa diin gina-obserbar ang kasakit, kamatayon kag pagkabanhaw ni Hesukristo.
