Lalaki nga nagapanukot sang utang sa Pototan gintiro sang barangay tanod

ILOILO — Kritikal sa ospital sa siyudad sang Iloilo ang lalaki nga nagapanukot sang utang sa Brgy. Bagacay, Pototan sang gintiro sang barangay tanod sang nasambit nga lugar pasado las-5 kaina sang hapon.

Ginkilala ang biktima kay Ryan Mendoza, residente sang Brgy. Guinacas, Pototan nga may pilas sa ulo, samtang suspect naman si Ian Pedroso, 50-anyos.

Sa impormasyon nga nakuha sang Aksyon Radyo Iloilo, may ginasukot si Mendoza sa higad sang karsada sang ginpalapitan siya ni Pedroso kag gintiro sang wala pa ma-identify nga pusil.

Ginahibalo pa sang police kun ano gid ang motibo sang pagtiro sang suspect sa biktima kag kun ano ang kaangtanan sang tanod kay Mendoza.

Ginapanawagan naman sang Punong Barangay sang Bagacay sa suspect nga mag-surrender.

GINBANTAYAN SANG SUSPECT

Ginbantayan sa higad sang dalan kag ginsundan sang suspect ang biktima sang shooting incident sa Brgy. Bagacay sa amo nga banwa antes gintiro samtang nagasakay sa motorsiklo.

Base sa CCTV camera footage sang barangay nga nahamtang sa atubang sang tiyangge kun diin gintiro si Ryan Mendoza, makit-an nga naglabay pa ang suspect nga si Ian Pedroso kag naghulat sa unhan.

Sunod nga nakit-an ang pag-abot ni Mendoza nga nagasakay sa motorsiklo kag nagdiretso sa tiyangge sa higad sang dalan.

Pero antes pa siya makadulog, dali-dali siya nga ginpalapitan ni Pedroso kag gintiro.

Makit-an man sa video nga gintayaan pa sang suspect ang biktima sang natumba sa motorsiklo.

Makaligad ang 20 segundos may nagguwa nga babaye halin sa tiyangge para lantawon ang biktima apang nakapalagyo na ang suspetsado.

WATCH CCTV FOOTAGE: https://bit.ly/3ksVVHQ