Barangay tanod nga nagtiro sa lalaki nga nagapanukot sang utang sa Pototan nadakpan

ILOILO – Nadakpan na si Ian Pedroso ang suspect sa pagtiro sa lalaki nga nagapautang sa Brgy. Bagacay, Pototan kahapon.

Kritikal sa gihapon sa ospital ang biktima nga si Ryan Mendoza sang Brgy. Guinacas, Pototan.

Suno kay Police Major Roy Tayona, hepe sang Pototan Police Station, nadakpan si Pedroso sa Brgy. Dawis, Pototan paagi sa hot pursuit operation kaina sang hapon. May mga residente suno kay Tayona, nga nagpadala sang impormasyon nga yara sa Brgy. Dawis ang suspek.

Preso sa Pototan Police Station si Pedroso.

Pagdumot ang ginasundan nga anggulo sang Pototan police sa pagtiro sang suspek kay Mendoza.

Base sa record sang Pototan Police Station, nagpa-blotter sang July 26, 2019 si Pedroso tungod gin-alegar niya nga gintayaan siya sang pusil ni Mendoza.

Gintinguhaan sang Aksyon Radyo Iloilo news team nga ma-interview si Pedroso pero wala siya nagasabat sa mga pamangkot.