No to Jeepney Phaseout Coalition ginaduso nga sa Pilipinas ipasad ang mga modernized jeepneys nga gamiton sa modernization program
ILOILO CITY – “Waay sing puturo ang ini’ng [PUV] modernization program nga ginahambal nila kundi monopolyo ini sa sector sang transportasyon halin sa magagmay nga operator pakadto sa dalagkuan nga kompaniya.”
Ini ang ginpabutyag ni Mr. Elmer Forro, secretary general sang Bayan Panay kag lead convenor sang “NO to Jeepney Phaseout Coalition” may kaangtanan sa modernization program sang gobyerno.
Gin-athag ni Forro nga wala sila nagapamatok sa nasambit nga programa pero ginakontra nila ang paggamit sang “imported mini bus” nga ibulos sa mga traditional jeepneys sa pungsod.
Ginaduso sang grupo nga kuntani mabakal lang sang makina sa iban nga pungsod kag diri ipasad sa Pilipinas ang mga modernized jeepneys nga gamiton sa programa.
Nagapati si Forro nga madamo sang mekaniko sa pungsod nga makahimo sini kag daku pa ang mabulig sa ila pangabuhian.
Kun matabo, suno sa iya, makabarato ang kooperatiba ukon kooperasyon sang transport sector kag indi na kinahanglan nga maggasto sang minilyon ka pesos agud magbakal sang “imported mini bus.”
“Madamo gid ‘ya maayo nga manugpasad diri. Actually mabilib ka sa mga abilidad sang Ilonggo kag mga Pinoy naton nga manugpasad gani kinahanglan man nila suportahan. Ti ngaa kinahanglan gid nga ihatag ini sa mga imported ukon dumulu-ong,” suno kay Forro.
