Modernized jeepney nakabunggo sa truck sa San Miguel
ILOILO — Na-ospital ang 12 ka sakay sang modernized jeep nga nakabunggo sa truck sa Brgy. 1, San Miguel, Iloilo kahapon, Marso 11.
Suno kay PSMSg Glenn Gasapo, imbestigador sang San Miguel Municipal Police Station, 19 tubtob 20 ang pasahero sang modernized jeep.
Nagasundanay sang truck kag modernized jeep suno kay Gasapo kag pareho nga padulong sa direksyon sang San Miguel town proper.
Ginkilala ang driver sang modernized jeep kay Gerald Tumale, 41, samtang ang driver sang truck amo si Vicente Garcia, 43.
Gin-ako ni Tumale, suno kay PSMSg Gasapo nga madasig ang iya pagpadalagan sang modernized jeep nga ginabanta 80/kph ang kadasigon bisan nga 60/kph lang kun tani ang speed limit sa highway.
Sa dugang nga pagpangusisa ni Gasapo, nag-preno pa si Tumale apang nadulaan sang kontrol sa manibela rason nga nagtakilid ang modernized jeep kag nakabunggo sa truck nga naga-signal nga magliko pa-wala.
