42-anyos nga lalaki nang-hostage sang iya iloy sa Progreso, Lapuz

ILOILO CITY –Naglawig sang apat ka oras ang pagpang-hostage sang lalaki sa iya iloy sa Brgy. Progreso, Lapuz.

Base sa inisyal nga impormasyon halin sa police, self-inflicted ang pilas ni alyas Charlie sa liug halin sa kutsilyo nga iya gina-uyatan.

Una na nga gin-report nga natiruhan ang lalaki, pero ginklaro ni Iloilo City Police Office (ICPO) OIC PCol Joeresty Coronica nga wala nagpalupok ang team nga nagsulod sa balay.

Napilasan man sa liug ang iloy tungod “nalab-ut” sang bladed weapon sang suspect suno kay ICPO spokesperson Police Major Shella Mae Sangrines.

Nagapasalamat si Coronica nga nasolbar sang matawhay ang hostage crisis kag wala sang casualty sa insidente.

Duha ka kutsilyo suno kay Coronica ang gin-uyatan ni Charlie —ang isa ginataya sa iya iloy samtang ang isa ginataya sa iya kaugalingon kag nagatuyo nga bun-on ang iya kaugalingon.

Isa ka team sang mga pulis ang nagsulod sa balay, upod ang taga-Bureau of Fire Protection.

Pareho nga gindala sa ospital ang mag-iloy.

Nagsugod ang pagpang-hostage las 11 kaina sang aga kag natapos pasado las 4 subong nga hapon.