Mag-asawa nga nagabaligya sang isda patay sang nabungguan sang elf truck sa Miagao
ILOILO — Patay ang mag-asawa nga manugbaligya sang isda sang nabungguan sang elf truck ang ginasakyan nila nga tangkal-tangkal sa Barangay Kirayan Norte, Miagao las 4 kaina sang kaagahon.
Suno kay Police Staff Sergeant Deogracias Nobleza, imbestigador sang Miagao Police Station, nagapundo sa higad sang karsada ang tangkal-tangkal sang mag-asawa nga Jessie kag Veronica Lozada sang Brgy. Rizal Estanzuela, City Proper agud magpasakay sang ila abyan nga si Franklin Vargas sang gulpi lang nabungguan sang elf truck nga ginamaneho ni Simplicio Fernandez, Jr, sang Patnongon, Antique.
Halin sa Patnongon, Antique ang direksyon sang elf truck suno sa pulis.
Tungod sa mabaskog nga impact, nagtabog ang mga sakay sang tangkal-tangkal kag nagbunggo sa windshield sang truck.
Ginpahayag ni Nobleza nga wala nagasiga ang pang-ulihi nga suga sang tangkal-tangkal, itum ang pinta sang salakyan kag medyo dulom pa tungod nga kaagahon gani posible nga wala namulalungan sang driver sang truck nga may naga-park nga tangkal-tangkal sa kilid sang karsada.
Dead-on-arrival sa ospital ang mag-asawa samtang critical naman si Vargas.
Arestado ang truck driver kag magapangatubang sang kaso nga Reckless Imprudence Resulting in Double Homicide kag Serious Physical Injury and Damage to Property.
