Arevalo police wala sang na-record nga insidente nga maangut sa Paraw Regatta Festival
ILOILO CITY – Nangin matawhay kag malinong ang selebrasyon sang 50th Iloilo- Guimaras Paraw Regatta Festival sa Villa Beach, Arevalo kahapon, March 19.
Suno kay Police Captain Resty Labasteda, hepe sang Arevalo Police Station, hugot nga seguridad ang ila ginpatuman tungod linibo ang mga nagsaksi sa highlight sang festival. Sa pagbanta niya, masobra 4,000 ang nagpadulong sa kahiwatan.
Wala man sila sang reklamo nga nabaton nga ma-angut sa festival sa pihak sang pagginutok sang mga tawo.
Kaagahon pa lang suno sa iya, ginsuguran na ang deployment sang kapulisan.
Ginpasiguro man ni Labasteda nga ilabe pa nila nga hugton ang pagbantay tungod may mga nakalinyada pa nga aktibidad subong nga gab-i kag madamo ang naga-inom sang makahulubog nga ilimnon.
