5 ka balay nasunog sa relocation site sa Lanit, Jaro
ILOILO CITY – Lima ka balay ang nasunog sa relocation site sa Lanit, Jaro kahapon Marso 22.
Suno kay Punong Barangay Remedios Bedia, naupos ang balay nanday Nandy Besano, Susan Sambas, Editha Biatrisola, kag Dionisio Fernandez, samtang partially-damaged ang balay ni Van Villanos.
Una na ginpahayag sang residente nga si alyas Mark nga nakibot na lang sila sang gulpi lang nag-ibwal ang kalayo kag wala sila sang ideya kun ano ang ginhalinan. Ginatudlo nga naghalin ang kalayo sa balay ni Besano antes naglaton sa kaiping nga pamalay.
Temporaryo nga matiner sa Day Care Center kag barangay hall ang mga nasunugan. Nag-apelar man sang bulig si Bedia para sa mga nasunugan pareho sang pagkaon, panapton, kag matulogan.
Padayon pa nga gina-imbestigaran sang Bureau of Fire Protection (BFP)- Iloilo City ang ginhalinan sang sunog kag kun pila ang kahalitan.
