10 kph speed limit sa mga nagabisikleta sa Esplanade, iban pa nga public places sa Iloilo City ginduso ni Councilor Johnny Young

ILOILO CITY – Plano ni Councilor Johnny Young nga butangan sang speed limit ang pagbisikleta sa siyudad.

Sa draft ordinance ni Young, naplastar nga dapat 10 kph lang ang maximum speed sang pagbisikleta sa tanan nga esplanade kag iban pa nga pampubliko nga mga lugar sa Iloilo City.

Nabutang man sa draft ordinance nga mabayad sang P250 ang violator, samtang ang Public Safety and Transportation Management Office ang ma-implementar kun mapasar gid man.

Naka-agenda sa regular session sang Konseho kahapon ang draft ordinance, pero ginpa-defer man ni Young sa first reading pa lang. Wala man gintumod sang konsehal kun ngaa ginpaiway niya ang pag-introduce sang ginaduso nga ordinansa.

Sa first reading sa pagpasar sang ordinance, gina-introduce ang title sang proposed ordinance.