5 nadakpan sa drug buy bust operation sa Bakhaw, Mandurriao
ILOILO CITY – Lima ang nadakpan sa drug buy bust operation sa Brgy. Bakhaw, Mandurriao kahapon. Abril 13.
Gindakup kanday Mycel Mena nga subject sang operasyon; utod niya nga si Joemar Mena, Josephine Jemina kag bata sang subject nga si Dan Michael, lunsay residente sang Bakhaw, kag Cynde Jastia sang Brgy. Cuartero, Jaro.
Sa interview sang Aksyon Radyo Iloilo kay Police Lieutenant Joebert Amado, deputy station commander sang Mandurriao Police Station, nabaklan nila si Mycel sang isa ka sachet sang suspected shabu. Samtang nadakpan suno sa iya, ang apat ka iban pa nga naga-pot session sa balay nanday Mycel nga ginakabig drug den.
Sa kabug-usan pito ka sachets ang na-recover sang kapulisan. Preso sa Mandurriao Police Station ang lima ka mga nadakpan kag natalana nga pasakaan sang kaso.
Ginkumpirmar ni Amado nga madugay na nila gina-monitor ang illegal nga aktibidad sang subject antes ginhimo ang operasyon.
Ginatinguhaan pa sang Aksyon Radyo Iloilo nga makuhaan sang pahayag ang mga nadakpan.
