Aksyon Jeremae Ventar isa sa mga nakapasar sa 2022 Bar Exams

ILOILO CITY — “Proud gid ako sa self ko kay nagpadayon ako [sa law school].”

Ini ang pahayag ni Atty. Jeremae Ventar, City Hall beat reporter sang Aksyon Radyo Iloilo nga nakapasar sa November 2022 Bar Examinations.

Suno kay Aksyon Jeremae, indi nangin mahapos ang iya nga journey tungod fulltime siya nga nagatrabaho, nagasuporta sa iya pamilya kag naga-eskwela pa.

Ginpabutyag niya nga wala siya kuntani sang plano nga magsulod sa law school pero sang nakita niya ang opurtunidad sa Central Philippine University (CPU) nga may scholarship ang mga first year nga may latin honor sa undergraduate, nagdesisyon siya nga mag-enroll.

First year lang kuntani ang luyag ni Aksyon Jeremae nga tapuson sa law school tungod luyag lang niya nga testingan ugaling gin-encourage siya sang iya nga ginikanan nga magpadayon na lang sa pag-eskwela.

Samtang naga-eskwela si Aksyon Jeremae, may mga tyempo suno sa iya nga luyag na lang niya nga tutokan ang iya pagtuon, pero kinahanglan pa niya magtrabaho.

Suno sa iya, nagatrabaho siya tubtob las-3 sa hapon kag nagatuon naman pagkatapos sini agud magpreparar sa iya klase halin las-6 tubtob las-9 sa gab-i.

Nangin mabudlay naman para kay Aksyon Jeremae ang pagpauli tungod nagalab-ut las-11 sa gab-i nga maka-abut siya sa ila balay tungod kinahanglan pa niya magbiyahe halin sa syudad.

Kinahanglan naman niya nga magtuon tubtob las-2 ukon las-3 sa kaagahon kag magbugtaw naman mga las-5 sa aga agud magpreparar sa iya trabaho.

Ginpahayag ni Atty. Ventar nga ginasigurado niya nga matapos ang iya nga follow up sa aga agud gilayon matapos para sa mga Public Affairs program sang Aksyon Radyo Iloilo.

Sang nahibaluan niya ang resulta sang Bar exam, nangin emosyunal siya kag nagpasalamat sa Ginuo tungod madugay na niya ginahulat ang resulta.

Ginpasalamatan man niya ang tanan nga nagsuporta sa iya nga journey.

Si Atty. Ventar ang anum na ka tuig nga beat reporter sang Aksyon Radyo Iloilo sa Iloilo City hall. –via Firingline