Ginatos ka mga Ilonggo nag-upod sa condemnation rally sang cause-oriented groups sa palpak nga Ungka flyover
ILOILO — Gin-updan sang nagkalain-lain nga sektor, mga cause-oriented groups, local officials, kag mga private individuals ang condemnation rally sa palpak nga Ungka flyover kahapon nga ginpangunahan sang grupo nga I-Act Now.
Ginatos ka mga Ilonggo ang nagsinggitan nga pa-imbestigaran kag pasabton ang mga responsable sa pagpalpak sang proyekto.
Sa iya speech, ginkwestyon ni Father Marco Sulayao sang Promotion of Church People’s Response Panay and Guimaras ang taga-DPWH kun ngaa indi sila makahambal kun sin-o ang dapat nga manabat sa kapalpakan sang flyover.
Ginpabutyag niya nga wala gid sang problema kun kay-uhon ang flyover para maghapos ang pagginawi sang mga Ilonggo apang ginkwestiyon niya kun sin-o ang magagasto para sa pagkay-o.
Dugang pa ni Father Sulayao, indi sila mag-untat kun indi mapasabat ang may kahilabtanan sa pagpalpak sang proyekto kag mapreso ang mga dapat mapreso.
Lakip sa mga local officials nga nagkadto sa rally sanday Iloilo City Councilors Plaridel Nava kag Sedfrey Cabaluna, kag si Pavia SB Member Pyt Trimañez.
