Resolution sang Sangguniang Bayan sang Pavia nga nagahingyo sa Senado nga imbestigaran ang Ungka flyover idul-ong sa Manila sa masunod nga semana
ILOILO – Suportahan sa gihapon ni Pavia Sangguniang Bayan (SB) Member Jose Maria “Pyt” Trimañez ang masunod nga lihok agud mapasabat ang mga involved sa kontrobersiyal Ungka Flyover.
Suno kay Trimañez, dapat maghimo sang gahod agud mabatian sang mga national officials kag ma-imbestigaran ang flyover.
“Kita tanan ubrahon naton ang tanan naton nga maubra para lang mabatian sang aton mga lideres sa ibabaw kag para masugudan na ang imbestigasyon para at least matagaan hustisya ang P680 million [nga gingasto sa Ungka Flyover] kag mapatuman ang ensakto nga solusyon para at least indi mabutang sa peligro ang naga-alagi dira sa idalom,” suno kay Trimañez.
Sang Lunes, nagpasar ang Sangguniang Bayan sang Pavia sang resolution nga nagahingyo sa Senado nga maghimo sang legislative inquiry sa Ungka Flyover. Idul-ong sang mga konsehal sa mga senador ang kopya sang resolution sa masunod nga semana.
Kahapon, Mayo 23, nag-upod sa condemnation rally kanday Trimañez, Councilors Leonardo Belasa, Dan Fajardo, kag Ex-Officio President Hanson Guyos agud suportahan ang lihok nga mapasabat ang mga involved sa Ungka Flyover.
