Lampos kag kuga ginkapatay sang lalaki nga ginhal-id sa katubuhan sa Dingle base sa autopsy result

ILOILO — Napatay tuga sang pagkalampos sa ulo si Dave Ablanzar nga ginpatay kag ginhal-id sa katubuhan sa Tinocuan, Dingle sang Mayo 15.

Ini base sa autopsy result sa bangkay ni Ablanzar, suno kay Police Captain Aileen Lacrite, acting Chief of Police sang Dingle Police Station.

Magluwas sa pilas sa ulo may lagub nga nakit-an sa dughan ni Ablanzar tuga sang pagkalampos man sang matig-a nga bagay.

Suno kay Lacrite, naggwa man sa autopsy nga ginkuga ang biktima tubtob napatay.

Una diri, ginsaysay sang isa sa duha ka suspek nga menor-de-edad nga pasado las-12 sang kaagahon sang Mayo 12 sang ginhagad siya ni Ablanzar nga magsulod sa kwarto kag ginpilit makighilawas, pero nagpamalibad siya rason nga may nagluntad ang komosyon kag ginbuno siya ni Ablazar sa kamot gamit ang kutsilyo.

Tungod sini, nagpangayo siya sang bulig kay Andrei Ticar, 20-anyos nga gilayon nagsulod sa kwarto dala ang martilyo kag ginlampusan sa likod sang ulo si Ablanzar.

Nagbato pa ang biktima suno kay Lacrite apang ginkuga siya sang duha ka suspects tubtob napatay kag ginputos sa bedsheet antes gindala sa katubuhan.

Gin-ipit sang mga igang nga bato ang bangkay ni Ablanzar kag gintampukan sang mga dahon.