Private watch group nga Grupo Konsumedor mapadala sang request sa Office of the Ombudsman agud imbestigaran ang palpak nga Ungka flyover
ILOILO CITY – Ipadala sang Grupo Konsumedor nga isa ka private watch group ang ila request sa Office of the Ombudsman sa masunod nga semana agud ma-imbestigaran ang kontrobersiyal nga Ungka Flyover.
“Maga-request kita for an investigation to determine possible liability on the part of the DPWH and also the contractor, possible liability in the light of what is happening in our Ungka Flyover,” suno kay Atty. Eldrid Antiquera nga presidente sang grupo.
Madugay na kuntani ini ginaplano sang grupo pero ginhatagan pa nila sang tsansa ang Department of Public Works and Highways (DPWH) kag International Builders Corporation (IBC) nga contractor sang flyover tungod nagpromisa nga solusyonan ang problema. Ugaling tubtob subong wala gid sang positibo nga resulta nga ginhimo, dugang ni Atty. Antiquera.
Ginapanindugan sang grupo nga taxpayers’ money ang gingamit sa proyekto kag perwisyo lang ang gintuga ilabe na sa mga riding public nga masami nagalabay sa lugar.
Nag-trigger suno kay Atty. Antiquera sa grupo ang resulta sang imbestigasyon sang Abinales Associates Engineers Plus Consultant, gin-hire sang DPWH agud mag-imbestigar sa pag-usmod sang flyover. Una na nga gin-report nga naga-usmod ang 16 tanan ka haligi sang flyover.
Ang grupo konsumedor, ginabug-usan sang nagkalain-lain nga mga propesyunal nga may katuyuan nga ipakigbato ang kinamatarong sang mga konsumedor.
