IPPO wala sang na-monitor nga hot spot areas sa Iloilo province para sa Barangay kag SK elections

Wala pa sang matumod nga lugar sa probinsiya sang Iloilo nga balantayan gid para sa Barangay kag SK Elections ang Iloilo Police Provincial Office (IPPO).

Suno kay Maj. Rolando Araño, spokesperson sang IPPO, may mga parametro man sila nga ginabasehan kun diin nga mga lugar ang balantayan gid kun mag-abot ang eleksyon.

Subong suno sa iya, normal pa man ang sitwasyon tungod madugay pa ang piniliay kag wala pa man mahibaluan kun sanday sin-o ang ma-file sang Certificate of Candidacy.

Lakip sa ila mga tutukan ang mga lugar nga nangin masandukot ang engkwentruhanay sang dalagko nga mga pulitiko kag mga partido. Tutukan man nila ang mga barangay nga may impluwensiya sang New People’s Army (NPA).

Luyag sang IPPO nga matapos ang eleksyon nga malinong kag magpangibabaw kun sin-o gid ang luyag sang mga tawo nga magdaug.