2 ka nagabantay sang jeep sa City Proper nahuligan sang semento halin sa building
Nahulugan sang semento halin sa building sa Ledesma Street, City Proper ang duha ka mga nagabantay sang jeep sa higad sang dalan, pasado las-5 kahapon sang hapon, Hunyo 3.
Malapit ini sa Grace Pharmacy kag Merzci Pasalubong Center sa linyada sang Unitop.
Naglingin ang ulo sang babaye nga taga-San Juan, Molo sang natup-an sang semento sa iya agtang, samtang sa alimpuduhan naman natup-an ang lalaki nga taga-Calumpang, Molo.
Ginpahayag sang duha nga nakibot na lang sila sang nagkalahulog ang buka nga mga semento sa ila ginatindugan.
Wala napilasan ang duha apang nagpula ang agtang sang babaye.
Temporaryo nga ginbutangan sang higut ang area kun diin may nagkalahulog nga semento agud indi malabyan sang mga tawo.
Sang Mayo 27, may nagkalataktak man nga semento halin sa haligi sang building sa JM Basa Street sa City Proper. Sa pagpangusisa sang Aksyon Radyo Iloilo news team, dilapidated na ang kisame kag haligi sang nasambit nga building sa atubang sang Shanghai Bazaar.
