Driver sang motorsiklo patay sang nabungguan sang jeep sa Tigbauan

ILOILO — Dead-on-arrival sa ospital ang driver sang motorsiklo sang nabungguan sang jeep sa Barangay Bagacay, Tigbauan kahapon sang aga, Hunyo 3.

Ginkilala ang driver sang motorsiklo kay Herby Tapales, 44-anyos sang Dorong-an, Tigbauan.

Ginamaneho naman ni Norberto Bidol, 40-anyos, sang Poblacion South, Oton ang jeep.

Suno kay Police Captain Mary Jane Panes, hepe sang Tigbauan Municipal Police Station, papuli na kuntani si Tapales sa Brgy. Dorong-an samtang pakadto sa banwa ang jeep.

Sa imbestigasyon sang police, gin-agaw sang jeep ang linya sang motorsiklo rason nga nabungguan niya kag nagtabog ang driver sa talamnan.

Ginhingagaw pa dala sa ospital ang driver sang motorsiklo pero wala gid natabangan.

Gin-detain sa Tigbauan Municipal Police Station ang driver sang jeep.