P7.2 million nga pondo sang Brgy. Jalandoni Estate, Lapuz na-withdraw sa bangko nga wala sang pahanugot ni PB Efren Gimeo
ILOILO CITY – Disappointed si Jalandoni Estate, Lapuz Punong Barangay Efren Gimeo sang natukiban nga gin-withdraw ang P7.2 million nga pondo sang barangay sa bangko nga wala niya sang pahanugot.
Gin-akusaran ni Gimeo kanday Barangay Treasurer Nigel Andrade kag Barangay Secretary Stella Joy Terrania nga yara sa likod sang ma-anomaliya nga pagkadula sang ila pondo.
“Sa kadaku nga pagka-shock namon sang nahibaluan namon sang May 17, 2023 nga ang ini nga mga tawo nga ginalauman ko tani makabulig sa akon nga maproteksyonan man ang kuwarta sang barangay are the same people nga sa isa ka tuig kag lima ka bulan, sige ang withdraw nila sang kuwarta sang barangay sa Land Bank of the Philippines [nga nagalab-ut tubtob] P7.2 million,” suno kay Gimeo.
Base sa mga dokumento nga nakuha sang kapitan, natabo ang 49 ka pag-withdraw sang kuwarta halin sang Enero 2022 tubtob Mayo 11, 2023.
Gin-ako ni Gimeo nga nagdumdom sila nga indi maka-withdraw sang kuwarta sa bangko tungod may warning sila halin sa Commission on Audit (COA) kag City Accounting Office tungod wala sang report nga ginsumiter si Andrade halin sang 2018 tubtob 2020 nga rason man nga indi sila makabaton sang honorarium. Sa pagkamatuod suno sa iya, ginapa-resign niya ini apang nagpamalibad man.
Natukiban sang mga barangay officials, suno kay Gimeo, nga naggamit sang punong barangay’s certification kag tseke kanday Andrade kag Terrania agud maka-cash advance sa bangko.
“So akon ni nga pirma, 200 percent forged gid ni nila nga duha,” dugang sang kapitan. Gindala ni Gimeo sa City Legal Office si Andrade agud pasiktuhon kag gintudlo niya si Terrania nga nagapameke sang pirma kag nagasugo sa iya nga mag-withdraw sa bangko.
Nag-file na sang reklamo si Gimeo sa National Bureau of Investigation (NBI) batok sa duha agud ma-imbestigaran ang kaso lakip na ang pagpameke sa iya pirma.
Ginatinguhaan pa sang Aksyon Radyo Iloilo nga makuhaan sang pahayag kanday Andrade, kag Terrania.
