Jaro police gin-untat ang imbestigasyon sa reklamo nga abduction sang 19-anyos nga lalaki
ILOILO CITY – Gin-untat sang Jaro police ang imbestigasyon sa reklamo nga abduction sang 19-anyos nga lalaki sa Jaro sang Hunyo 19.
Ini ang ginkumpirmar ni Police Captain Lester Oliveros, hepe sang Jaro Police Station.
Ginpaathag ni Oliveros nga wala nila nakita ang van nga puti kag wala man ang estudyante sang gin-review nila ang CCTV footage sa Libertad-Sta. Isabel, Jaro sa diin gin-alegar sang lalaki nga gin-abduct siya. Kaupod man suno kay Oliveros nga naglantaw sang CCTV footage ang pamilya sang estudyante.
Dugang ni Oliveros, ginpaathagan naman nila ang pamilya sang resulta sang imbestigasyon.
Ginpabutyag naman sang pamilya nga i-check nila sa eskwelahan ang status sang estudyante.
Nagreklamo ang 19-anyos nga papuwersa siya nga ginkuha sang lima ka lalaki kag ginpasakay sa puti nga van kag ginbilin sa San Antonio, San Miguel tungod nasal-an lang siya.
