P1.1 million nga balor sang suspected shabu na-recover sa buy bust operation sa Calaparan, Arevalo

ILOILO CITY—Na-recover sang kapulisan ang apat ka dalagko nga sachets sang suspected shabu nga nagabug-at sang 170 grams kag ginabanta nagabalor sang P1,156,000 sa drug buy bust operation sa Calaparan, Arevalo kagab-i, Hulyo 18.

Ginkilala ni Captain Glen Soliman, team leader sang Regional Police Drug Enforcement Unit (RPDEU) ang subject kay Wencil Provido, 38-anyos sang Zamora-Milleza, City Proper.

Tumandok sang Zamora-Milleza si Provido kag naga-arkila lang sa Calaparan base sa impormasyon nga nakalab-ut sa police.

Sang ginhimo ang operasyon kag nahibaluan sang subject nga police ang iya katransaksyon, ginhaboy pa niya ang illegal drugs tungod nakibot siya suno kay Soliman.

Antes ang operasyon, “matunog” na ang ngalan ni Provido suno kay Soliman tungod madamo ang nabaton nila nga report sa illegal nga aktibidad sang subject.

Usisaon sang RPDEU kun diin nagakuha sang supply sang illegal drugs ang subject.

Ginatinguhaan sang Aksyon Radyo Iloilo News team nga makuhaan sang pahayag ang subject.