“If you are qualified to run under the law, you can always run here in Iloilo”—Iloilo Gov. Arthur Defensor, Jr. sa pahayag ni Sen. Imee Marcos nga posible magpadalagan sa Iloilo ang bata ni Pres. Marcos, Jr.

ILOILO — Wala sang poder si Iloilo Governor Arthur Defensor, Jr. nga balabagan ang bisan sin-o nga may tuyo nga magpadalagan sa anu man nga posisyon sa Iloilo Province.

Ini ang pahayag sang gobernador sang ginpamangkot sang mga katapo sang media sa iya reaksyon may kaangtanan sa statement ni Senator Imee Marcos nga posible magpadalagan ang isa sa mga bata ni President Ferdinand Marcos, Jr. sa Iloilo.

Suno pa sa gobernador, kinamatarong sang bisan sin-o nga indibidwal nga magpapili sa masunod nga mga eleksyon.

“It’s not for me to welcome those who want to run in Iloilo City or the province. It’s [a] matter of right,” dugang pa ni Defensor.

Una na nga nakapaguwa sang statement si Iloilo City Mayor Jerry Treñas nga madugay na nga nagalapta ang impormasyon nga mapadalagan ang isa sa mga miembro sang pamilya Marcos sa Iloilo City.

Ginpasalig man sang alkalde nga pamangkuton si First Lady Marie Louise “Liza” Araneta Marcos kun magkitaay sila sa palaabuton nga mga okasyon.