Sunog sa 2-storey structure sa Arguelles St., Jaro nagbilin sang P360K nga kahalitan

ILOILO CITY — Ginabanta sa P360,000 ang balor sang kahalitan sang nasunog ang two-storey structure sa Arguelles St., Jaro las-9:30 kahapon sang aga, Hulyo 23.

Suno kay Fire Officer 3 Anthony John Triveles, arson investigator sang Bureau of Fire Protection-Iloilo City, nahamtang sa 2nd floor ang ginabaligya nga mga fire extinguisher sang naga-arkila samtang sa idalum nagatiner ang tag-iya sang structure.

Base sa initial nga imbestigayon sang BFP, nagsugod ang kalayo sa 2nd floor nga wala sang tawo kag naglaton lang sa iban nga parte sang balay sa idalum.

Wala sang may napilasan sa insidente, suno kay Triveles.

Gina-imbestigaran pa sang BFP kun paano nag-umpisa ang sunog.