Tricycle driver patay sang gintiro sa Bonifacio, Arevalo

ILOILO CITY – Dead-on-arrival sa ospital ang tricycle driver sang gintiro sa Bonifacio, Arevalo subong nga aga.

Gin-identify sang iya asawa ang biktima kay Arnold Elipio, residente man sang amo nga barangay.

Suno sa asawa, wala pa siya sa ideya sa motibo sa pagtiro sa iya bana tungod wala man siya sang nasugid nga kontra.

Mga lima ka bulan pa lang sang nagbata ang asawa sang biktima.

Suno sa isa ka residente, una niya nga nabatian ang lupok sa unhan kag ang pagdalagan sang biktima samtang ginalagas sang suspek nga nagasakay sa motorsiklo.

Natumba suno sa iya ang biktima sa atubang gid sang isa ka tiyangge. “Pagtumba niya, gin-finishing pa siya sa ulo.”

Pagkatapos tiro, nagpalagyo ang suspek pabalik sa direksyon sang Arevalo Public Market, suno pa sa nakakita.

Na-recover ang pito (7) ka fired cartridge case sang 40 caliber kag isa ka ammunition sang amo man nga pusil, isa ka fired cartridge case sang 25 caliber, kag isa ka deformed fired bullet.

Ginkumpirmar naman ni Barangay Kapitan Allan Macazar sang Bonifacio, Arevalo nga nasalabat ang iya barangay secretary sang gintiro si Elipio.

Suno sa kapitan, nagasakay sa tricycle ni Elipio si Barangay Secretary Geraldine Diocson.

Suno sa bata ni Diocson, may igo sang bala sa wala nga kamot kag idalum sang ilok.

Nagapirma sang mga dokumento si Kapitan Macazar sang nabatian ang sunod-sunod nga lupok. Nagsulod si Diocson nga duguon na gani nga gindala siya gilayon sa ospital.

Padayon nga ginabulong sa ospital si Diocson.

Yara si Macazar sa balay sang ila kagawad nga temporaryo nila ginhimo nga barangay hall sang natabu ang shooting incident.