Suspek sa pagpatay sa tricycle driver sa Bonifacio, Arevalo nakuhaan sang litrato
Ginpadala sang concerned citizen sa Aksyon Radyo Iloilo ang litrato sang suspect nga naka-helmet, nakasuksok sang gray nga t-shirt, kag nakapantalon nga nagtiro kay Arnold Elipio sa Bonifacio, Arevalo kahapon sang aga, Hulyo 31.
Suno sa witness tatlo (3) ka lupok ang iya nabatian, antes nagpanaog sa motorsiklo kag nagpalupok pa gid apat (4) ka beses. Pagkatapos tiro, nagpalagyo ang suspek nga nagliko sa “Dinagyang Siopao” nga sakop sang Fegueroa St. Corner Bonifacio.
Halin Fegueroa St. Corner Bonifacio lapos ang karsada sa national highway. Ang wala pakadto sa direksyon sang Oton ang tuo pabalik sa Iloilo City.
Pabalik sa direksyon sang Arevalo Public Market, suno pa sa nakakita.
Gindala sa ospital ang biktima pero gindeklarar nga dead-on-arrival.
Samtang, nagapati si Bonifacio, Arevalo Barangay Kapitan Allan Macazar nga pulitika ang rason sa pagpatay kay Elipio tungod bata-bata niya ang biktima.
Sa panaysayon naman sang asawa sang biktima, wala siya sang nahibaluan nga kontra ukon may naakig kay Elipio.
Sa subong ginahibalo pa sang mga pulis kun ano ang motibo sa pagpatay kay Elipio.
Backgrounds:
