7 ka kiosko sa Amnesia Compound sa San Rafael, Mandurriao ginpasiraduhan sang city government

ILOILO CITY – Ginpasiraduhan sang Compliance Team sang Iloilo City Government ang pito ka mga kiosko sa Amnesia Compound sa San Rafael, Mandurriao tungod sa kakulang sang permits subong nga hapon.

“Ari dala namon ang closure order nga pirmado ni Mayor [Jerry] Treñas bangud nag-operate ang ini nga mga establisemento nga waay anay mahimos ang mga requirements nila especially ang business permit kag ang occupancy permit sang sini nga building,” suno kay Compliance Team Head Nestor Canong.

Sa pagkamatuod suno kay Canong, pila ka beses na nga ginpadal-an sang notisya ang mga operators sang mga kiosko nga nagapahanumdom nga hikuton ang ila mga permits pero wala gid sang aksyon. Magluwas diri, ginakadtuan man sila sang Compliance Team agud paandaman nga posible pasiraduhan kun indi sila magkuha sang permit sa city government.

Tungod sini, ginmandu ni Mayor Treñas nga pasiraduhan ang mga kiosko.

Indi sila pagpasugtan nga magbukas tubtob nga indi mahikot kag makumpleto ang mga permits nga kinahanglanon antes maka-operate. —via Angel Mae Ciudad/Maria Kayla Tingzon